主頁 > 專家與你 > 專欄 > 許傳芳 > 關於痹症

關於痹症

3年前

看物理治療其中一個較普遍嘅症狀就係麻痹,可能個別手指或腳趾,可能整隻手或腳。病人一般好緊張,因為佢地認定一定係神經線被壓著,後果會不堪設想。但其實神經線受壓係咪咁普遍呢?

西方醫學好多診斷,例如坐骨神經痛(Sciatica)、腕管綜合症(Carpal tunnel syndrome)、頸椎神經根壓迫(cervical radiculopathy)等等,都強調神經的病變,所以求診嘅人都會好緊張,想知道自己邊條神經線出咗事,但臨床來說,以我自己經驗,大部份嘅痹症都同神經無直接關係。就算好多時候病人攞住MRI(磁力共震)報告同我講話邊節邊節個椎間盤突出壓住神經線喎,我都當係一個參考。第一,因為X-RAY、 MRI本身睇出嚟嘅野同病人本身嗰徵狀未必吻合。第二個原因,唔同人睇同一塊片出嚟嘅結論其實都可以頗有出入(inter-rater reliability)。因此要睇到一個全面嘅畫面,除咗要有測試報告外,仲要靠人手去檢查。

舉例最近處理過有個case,病人五十來歲,跑開步,身體一向健康。早幾個月跑步練習多咗,開始發覺步行多了,右腳自臀部至腳板底會扯住痛,而且腳趾公底部長時間(24小時)會有麻痹嘅感覺,觸摸時感覺同左腳爭大概4成,麻痹嚴重時甚至影響睡覺。醫生幫佢照過MRI結論係椎間盤突出(PID)壓住神經線,係醫院做過拉腰,電療等,但唔見好轉。

我檢查後,試過不同嘅測試,發覺徵狀跟脊骨位置及移動似乎沒有關係,亦都檢查過幾個下肢常見嘅神經受壓位置,似乎都同徵狀無關。不過有幾個發現,第一,病人右下肢肌肉相對左邊緊,特別係小腿嘅比目魚肌(soleus)以及腳底嘅深層肌肉。第二,右邊盤骨及股骨輕微移位。第三,腳趾公相對其他腳指凍。

綜合各方面,我認為佢右腳扯住痛係因為肌肉過緊所致,我請病人示範日常拉筋動作,原來好多肌肉都無拉,有拉嘅動作都有部份錯,因此我重新教一次正確嘅拉筋方法。至於腳痹,我認為主要由於佢下肢肌肉過緊妨礙咗血循環,尤以腳板內側深層肌肉影響最大,因為腳趾公嘅血管主要係附近穿梭。所以在拉筋以外,再使用衝擊波集中打鬆腳板肌肉,再加上針灸及在腳趾公放幾滴血,幫佢通番血氣。最後調較錯位嘅盤骨位置,四樣齊下,過咗數次治療後,基本上拉扯痛感覺完全沒有,而腳趾公嘅痹已經好番一半。

痹症既case非常有趣,可以引至麻痹嘅原因除咗神經受壓外還有很多,但正正呢樣野先令呢類case變得challenging,而得到嘅滿足感亦最大。

by 物理治療師
許傳芳

醫療網絡

加入會員

定期舉辦各式各樣的活動,涵蓋保養、飲食、健康等活動,而透過各方品味的交流,希望為閣下帶來更新更擴闊的視野。
請用以下的瀏覽器瀏覽本網部以達到最佳效果。